ఆత్మ బంధువు....ఆత్మీయత సింధువు

ఏ కథ అర్థాంతరంగా ముగియదు 
అర్థ రహితంగా మిగలదు 
అహంకారంతో మొదలెట్టామా 
అవమానాలతో అంతమవుతుంది 
అత్యాశాలతో అడుగుపెట్టామా 
అడియాశలతో అంతరిస్తుంది 
అనుమానాలతో అడుగు అడుగు చూసుకుంటూ 
అనుక్షణం భయపడుతూ 
ముందుకు సాగామా 
అపార్థాలతో శాపనార్థాలతో సెలవుతీసుకుంటుంది
ఎవరు ఎవరి జీవితంలో అడుగుపెట్టినా 
ఎవరు ఈ యవనిక నుండి నిష్క్రమించినా 
నిక్కచ్చైన  హేతువేదో ఉండే ఉంటుంది.
నిబద్ధత నీలో  నిలువెల్లా  ఉన్నప్పుడు
నిస్వార్థం, నిష్కపటం నీ వెంట నీడలై నడిచేటపుడు 
సహనం, సంస్కారం పెట్టని కోటలై ఉన్నపుడు 
ఏ బంధం నిన్ను బందీని చేయలేదు 
ఏ రాగం నీతో పెడ రాగాలు పెట్టించలేదు 
నిన్ను ఒంటరిని చేసి వ్యాకులత కలిగించలేదు 
ఏ  స్నేహం నీ సున్నితత్వాన్ని గాయపరచలేదు 
ఆత్మీయతను పంచుకునేవారు ఆత్మబంధువులై  నిలుస్తారు 
అంతుబట్టని ఎజెండా తో కలిసినవారు రాబందువులై పీడిస్తారు 

trainerudaykumar@gmail.com